भिडियो हेर्न तलको बक्स भित्र किल्क गर्नुहोस
 |
१ जेठ काठमाडौं । हुन त सोमबार साँझसम्म काठमाडौं महानगरपालिकाको भोट १ हजार पनि गणना भएको छैन । लाखौं मतदाता भएको महानगरका दुई चार सय मतकै आधारमा विश्लेषण गर्नु निकै हतारो हुन सक्छ । तर, मतगणनाको सुरुवात अति नै रोमाञ्चक देखिएको छ ।
काठमाडौं महानगरको मतगणनाको सुरुमा केही समय कांग्रेसका राजुराज जोशी रञ्जु दर्शना र किशोर थापाभन्दा पनि पछि परे । नेपाली कांग्रेसजस्तो पुरानो र राजधानीको बलियो भनिएको पार्टी मसिना दलहरुसँग प्रतिस्पर्धा गर्दैछ, जुन कम्ता रोचक विषय होइन ।
अघिल्लो चुनावमा राजधानीबासीले एकभोट दाइलाई एकभोट गाईलाई भन्दै नेपाली कांग्रेसलाई बढी सीटमा जिताएका थिए । उनीहरुले हिन्दुराष्ट्र र राजतन्त्रको वकालत गर्ने कमल थापाको पार्टीलाई समानुपातिकतर्फ काठमाडौंमा पहिलो दल बनाएका थिए ।
तर, सोमबार सुरु भएको काठमाडौं महानगरपालिकाको मतगणनालाई हेर्दाखेरि यसपटक राजधानीबासीले एकभोट अर्कै दाइलाई खसाएको देखियो । दाइ अर्थात किशोर थापालाई ।
रविन्द्र मिश्रले भर्खरै खोलेको साझा पार्टीबाट क्यामेरा चुनाव चिन्ह लिएर उठेका पूर्वसचिव किशोर थापाले सम्मानजनक मत ल्याइरहेका छन् । कतिपय बेलामा उनी कांग्रेसभन्दा अघि बढेर एमालेलाई पछ्याउँदैछन् ।
त्यसैगरी सबैभन्दा कलिलो उमेरकी विवेकशील नेपालीकी रञ्जु दर्शनाले पनि एमालेका विद्यासुन्दर शाक्य, कांग्रेसका राजुराज र साझा पार्टीका किशोर थापालाई पछ्याइरहेकी छिन् ।
यो स्थितिलाई आँकलन गर्दा यसपालि राजधानीबासीले एकभोट दाइ (किशोर) लाई र एकभोट बहिनी (रञ्जु) लाई दिन चाहेको स्पष्ट छ ।
राप्रपा र एमालेवीच तालमेल भएको अवस्थामा मेयरका उम्मदेवार विद्यासुन्दर शाक्यले अग्रता कायम गर्नु स्वाभाविकै हो । तर, उपमेयरमा एमालेसँग तालमेल गरेका राप्रपामा राजाराम श्रेष्ठले पाएको मत हेर्दाखेरि उनलाई एमालेले धोका दिएको आशंका गर्न सकिन्छ ।
राप्रपा समेतको मतले विद्यासुन्दर अगाडि देखिए पनि एमालेसँग तालमेल गरेका राजाराम श्रेष्ठ भने उपमेयरकी कांग्रेस उम्मेदवार हरिप्रभा खड्गी भन्दा निकै पछाडि छन् ।
राप्रपालाई यसपटक राजधानीमा एमालेले मात्रै धोका दिएको होइन, काठमाडौंबासीले नै नरुचाएको अनुमान लगाउन सकिन्छ ।
यसपालिका राप्रपाको मत राजधानीमा मात्रै होइन, अन्य महानगर र जिल्लामा पनि खासै उत्साहजनक देखिएको छैन ।
राप्रपाजस्तै हालत यसपालि काठमाडौं उपत्यकामा माओवादीको पनि बनेको छ । आफ्नो स्वतन्त्र पहलकदमीमा भन्दा कांग्रेससँग तालमेल गर्न रुची गरेको माओवादीको मत राजधानीमा यही अवस्थामा मात्रै झर्यो भने जमानत जफत गर्नुपर्ने स्थितिमा नपुग्दा भन्न सकिन्न ।
काठमाडौं महानगरपालिकाको मतगणनाको रुझानलाई हेर्दाखेरि एमालेले पनि डराउनुपर्ने अवस्था किन छ भने राजधानीबासीले आगामी निर्वाचनमा विवेकशील र साझा पार्टीलाई रोज्ने सम्भावना बढेको छ, यो कांग्रेसका लागि मात्रै होइन, एमालेका लागि पनि खतरा हो ।
काठमाडौंमा संघीय समाजवादी र नयाँ शक्ति पार्टीका तर्फबाट पवित्र बज्राचार्य पनि मेयरका प्रत्याशी छन् । तर, राजधानीको राजनीतिमा नयाँशक्तिका अभियन्ता डा. भट्टराईले भन्दा पनि उज्जल थापा र रविन्द्र मिश्रले बाजी मारेको देखियो ।
र, यो चुनावको परिणामले काठमाडौंमा केजरीवाल जन्मने संकेत देखिएको छ ।
तर, यसलाई दुर्भाग्य नै मान्नुपर्छ, विवेकशील र साझा पार्टीले काठमाडौंमा संयुक्त उम्मेदवारी दिएर दाइलाई मेयर र बहिनीलाई उपमेयरमा उठाएको भए कांग्रेस र एमालेले हात हुनुपर्ने अवस्था आउने रहेछ ।
तर, आगामी चुनावका लागि यो सम्भावना सकिएको छैन । रञ्जु वा किशोरको जितकाे सम्भावना टरेको छैन ।
महानगरपालिका बाहेक काठमाडौं जिल्लामा बाँकी ५ नगरपालिकामा भने कांग्रेस ५ स्थानमा र एमाले ४ स्थानमा अग्रस्थानमा छ । चन्द्रागिरी नगरपालिकामा भने माओवादी अग्रस्थानमा छ ।
२०७४ जेठ १ गते २१:०६ मा प्रकाशित
भिडियो हेर्न तलको बक्स भित्र क्लिक गर्नुहोस
|
|
No comments:
Post a Comment